Den estrecho koperashon ku Vesta

WILLEMSTAD.- Fundashon Real Madrid ku ta un organisashon sosial di e ekipo grandi spañó di Real Madrid, pa promé biaha ta organisá un klínika aki na Kòrsou. E klínika lo tuma lugá den luna di ougùstùs próksimo riba dianan 5 pa 9.

Esaki a keda revelá ayera atardi den un rueda di prensa organisá pa e ekipo di Vesta i tambe e Fundashon Real Madrid. Presidente di Vesta kende ta Erick Lourens, a splika ku Vesta pa hopi aña kaba ta okupá nan mes ku duna training di futbòl na mas o ménos 200 mucha i ku ta un soño di nan pa pone un akademia di futbòl riba pia  aki na Kòrsou.  Den kuadro di esaki Vesta a logra haña kontakto ku e organisashon di Real Madrid kual a mustra interes pa duna Vesta un man den realisashon di e soño aki.

E klínika den luna di ougùstùs aki ta un dje promé stapnan den direkshon di e proyekto grandi pa yega na e akademia.  Representante di Fundashon Real Madrid Andres Muntaner,  a trese dilanti ku e fundashon ta okupá su mes ku diferente obra karitativo den diferente pais i ku nan a drenta den e zona di Karibe awor via di Brian van den Bergh kende ta fungi komo nan representante pa e zona aki. Tambe Muntaner a gradisí e spònsernan ku ta Banco di Caribe i  Digicel ku a yuda grandemente pa e proyekto aki di e klínika bira posibel.

Na nan turno e representante di Banco di Caribe,  Eddy De Kort junior a bisa di ta un honor i un privilegio pa nan di kontribuí ku tipo di proyekto asina aki, pasó ta nos muchanan ta esnan ku ta saka kara di Kòrsou ora nan yega den eksterior.

Jorge Quartas (Digicel) a bisa ku nan ta yuda pasó Kòrsou ta pasando den un tempu hopi difísil i ta empresanan mester yuda karga e momentu aki.

E klínika

Pa loke ta e klínika mes tin mas o ménos 120 mucha ku a inskribí kaba. E klínika ta pa hóbennan di 6 pa 13 aña i ta kosta 300 dòler. Kada mucha lo risibí un unifòrm kompletu, un tas backpak, bòter di awa, un bala Adidas, pin, sertifikado i un aña miembresia di Real Madrid.  Tambe lo skohe dos hóben ku lo biaha pa Real Madrid pa kore un stazje ku tur gastu kubrí.

...Hóbennan pará huntu ku representante di Fundashon Real Madrid i tambe spònsernan Banco di Caribe i Digicel...