WILLEMSTAD.- Manera ya ta un kustumber, SGR groep – Fundashon Verriet ta dòrna e bibiendanan na Emmastad pa trese e ambiente di fin di aña pa su klientenan.
Ta hasi esaki na un manera masha kreativo, hasiendo uso di materialnan resiklá. Pa hasi esaki ainda mas spesial pa nan klientenan ta inougurá e dekorashon den un ambiente festivo.
Lo tin animashon musikal di Dibo Doran, Grupo Ruta, Carmelita i mas. Tambe lo tin un bazar, tur e kasnan lo tin algu di bende, entre otro sùlt, ayaka, bolo, kesio, djus natural i hopi mas.
Pueblo di Kòrsou ta keda kordialmente invitá pa bishitá e aktividat aki pa kompartí un ratu ameno. E aktividat ta tuma lugá awe, lo hasi apertura i sende lus pa 6.15 di atardi. SGR- Groep – Fundashon Verriet ta situá na Prinsenlaan # 5 na Emmastad. Entrada ta grátis.