MERKA.- E agrupashon Mana lo risibí e premio ‘Persona di Aña’ di Latin Grammy Awards i dje forma ei kombertí su mes den e promé banda ku ta keda rekonosé ku e premio aki pa Latin Grammy.
E grupo mehikano, Mana, a bisa ku e galardon di Latin Grammy ta algu inesperá i tambe un regalo pa nan trayektoria musikal.
‘E ta un sorpresa pa nos, pero nos ta hopi kontentu. Nos karera tabata un duru, hopi bunita i apashoná, pero mester a traha duru i move poko poko padilanti, asina e kantante di Mana, Fher Olvera a komentá.
Mana lo risibí e premio di ‘Personahe di Aña’ den un anochi di gala ku lo tuma lugá dia 14 di novèmber próksimo den hotèl Mandalay Bay na Las Vegas, un dia promé ku den e mesun siudat tin e di 19 edishon di ‘Latin Grammy’.
E galardon ku ta duna un homenahe na logronan artístiko i filantropiko di figuranan di músika latino, a premia den pasado artistanan di renombre manera Marc Anthony, Miguel Bose, Shakira, Alejandro Sanz, Gloria Estefan, Juan Gabriel, Gilberto Gil, Juan Luis Guerra i Julio Iglesias.
Forma pa Fher Olvera, Alex Gonzalez, Sergi Vallin i Juan Calleros, Mana a akumulá mas ku tres dékada di músika ku temanan impekabel manera: ‘Rayando el Sol; i ‘Clavado en un bar’.
Ku e emoshon di optené e distinshon, Olvera a probechá pa e momento briante aki rekordá e momentunan duru na kuminsamentu dje banda kaminda nan tabata move di un presentashon pa otro presentashon den un vèn kargá ku instrumènt i te hasta tin biaha drumi den dje pasó no tabatin kamber di hotèl. Despues tur kos a kuminsá kambia poko pa poko birando mihó, ku presentashon nashonal, despues internashonal i awor ku e galardon pa ‘Personahe di Aña’, asina Olvera a terminá bisando.