WILLEMSTAD.- Ayera tardi Fundashon J.A.G. huntu ku Sektor di Kultura i Deporte a tene e promé rueda di prensa relashoná ku temporada di Karnaval 2018.
Un kantidat di informashon a keda kompartí ku prensa ayera tardi i loke mas a resaltá ta e echo ku Gobièrnu ke pas, kumplimentu i alegria den Karnaval 2018.
Minister Sra. Alcalá-Wallé den su diskurso ayera tardi a introdusí e lema di Karnaval 2018 ku ta ‘Pensa, Marcha i Gosa Bèrdè’ i tambe e organisadónan di Karnaval 2018 ku ta Fundashon J.A.G.

RUTA KARNAVAL

Sra. Alcalá-Wallé a informá ku e ruta pa Karnaval no ta aprobá ainda. A instalá un komishon pa inspekshoná e ruta di Karnaval. Djaweps awor, 7 di desèmber 2017, durante di dia e grupo lo hasi e inspekshon di ruta. Lo kontrolá pa wak si tin peliger riba e ruta, buraku den kaya, kasnan kantu di kaminda lo keda inspekshoná i lo tira bista tambe riba situashonnan di naturalesa ku lo por bira un peliger durante dje marcha di Karnaval. Aki menshon a keda hasí di por ehèmpel e nèshi di abeha ku a keda konstatá den Roodeweg durante di Marcha Hubenil 2017.
Ta e intenshon pa e komishon duna su raportahe djaweps awor mes pa dje forma ei esaki keda atendé den Konseho di Minister i pa aprobá e ruta di Karnaval 2018.

GASTUNAN ADISHONAL

Un dje desishonnan ku Gobièrnu a tuma ta pa paga e gastunan adishonal di Karnaval 2017 pa dje forma ei kuminsá Karnaval 2018 sin debe. E komishon organisadó, den e kaso aki J.A.G. lo mester mantené su mes den e kuadro ku Gobièrnu a pone pa evitá ku na final di temporada tin debe.