WILLEMSTAD- Sakamentu di disko kompakto awendia a bira algu ku no ta negoshi i ku ta pèrdida so mayoria artista tin ku esaki. E motibu ta ku e disko kompakto ta keda kopiá i otronan ta bend’é bou di preis.

Tin hasta disko kompakto ku bandanan a traha duru pa por logra pone riba merkado ku den apénas 2 dia ya e disko kompakto tabata riba merkado pretu pa 5 florin. GENTZ su forma di traha ta otro i no tabatin intenshon di bai para saka disko kompakto pa loko.

Nan forma di drai ta ku kada tantu tempu nan ta lansa un di nan kantantenan ku un komposishon i ta manda esaki pa medionan di komunikashon. Despues di e dos piesanan kampion di tantu Randy Cordilia komo Amos Balentien, awor Gentz ta bai trese e komposishonnan di Ray Lauffer i esun di Djuric Virginie.

Ya nan ta grabá kaba i awor ta e momentu adekuá ku nan tabata warda pa esakinan keda lansá.  Di fuentenan ku por sa ta trata di 2 piesa masha bon mes i ku no tin duda ku pa e fin di aña aki nan lo bai zona masha bon mes den kaya.