WILLEMSTAD.- E formashon musikal Gentz Tre’Chic ta den Festival di Tumba 2019. Nan lo kompañá tres tumbero riba djamars, 5 di febrüari 2019. Konosí pa nan inovashon ku nan a trese durante di nan promé partisipashon na Festival di Tumba, e banda ta sigui inová. Pe aña aki nan lo kompañá Chony Nahr kende lo interpretá e komposishon di Gregory Colina titulá ‘Na mi manera mané mi ke’. E duo di Chony i Gregory ta trahando ku otro pa mas ku 1 aña kaba i tin progreso. Aña pasá Ray Lauffer a skor bon komo promé finalista ku un komposishon di Amos Balentin. E aña aki Ray ta uni ku Axel Pikero kende ta su kompositor i areglista. E título dje tumba ‘Ban pa bai’ ta duna indikashon kaba ku e públiko tin ku move. Por último Juni Juliet ta keda kompaña pa Gentz. ‘Te koi mi ke sinti’ ta título dje komposishon ku Juni a kompartí ku Ike Jesurun. Derrel ‘Titi’ de Palm i Dwight Leoneta ta e areglistanan. Riba foto nos por apresiá algun momentu durante di ensayo ayera nochi na momentu ku Juni Juliet tabata pasando su tumba.