WILLEMSTAD.- Tumando nota di tur e reakshonnan den media i media sosial gerente di Gentz kier a ekspresá lo siguiente.
Tur medaya tin dos banda, i lo ta bon promé ku un persona duna su opinion, e sa e motibu i e orígen di esaki. Spesialmente pa nos amigunan lokutor, por fabor promé bo habri bo mikrofon i duna kualke opservashon òf opinion kual mester ta ophetivo hasi bo trabou di un forma profeshonal i no emoshonal.
Bisando esaki nos kier pone un i tur na altura ku maneho di Gentz i di Icons a sinta na mesa konhunto ku AMAK pa a pone tur desakuerdo riba mesa. Di parti Gentz nos a trese tur nos puntonan dilanti i a ekspresá nos pensamentu na e gerensia di Icons. Nos a pidi pa respetá nos opinion meskos ku nos ta hasiendo esaki pa ku nan i un biaha mas Gentz ta skohe pa laga loke a sosodé tras lomba.
Pa loke ta trata e asuntu di jump-in nos kier remarká ku Gentz na niun momentu so no ta organisando ningun jump-in. Mas bien na momentu ku promotornan a tuma nota di e fechanan habrí a aserká gerensia di Gentz pa ‘book’ e fechanan, kual netamente ta riba mesun fechanan di e jump-in di MCB i SVB lo tuma lugá. Nos simplemente a publiká "save the date" riba nos facebook. Ademas nos kier trese dilanti tambe ku bèrdat nos tabatin kombersashon ku e tim di e jump-in di "Rei nan di Kaya" i nos a splika adelantá nos ponensia, pero naturalmente ta keda na e organisashon kua ta e bandanan ku nan lo a skohe pa presentá! Pues finalmente pueblo tin mag di disidí libramente unda e ke bai pa gosa.
Pa finalisá nos kier remarká ku GENTZ a wòrdu lantá dor di músikonan ku un ambishon  i amor pa músika. Pues ku e energia positivo aki nos  lo kontinuá  krea bon músika i ta pèrkurá  pa esaki ta e enfoke di alegria i goso pa nos pueblo.
Un felis temporada di karnaval 2020 -Gentz Sende - Gentz Par'é.