WILLEMSTAD.- Geraldine “Gera” Dania-Martina ta un di nos figuranan grandi den deporte di vòlibòl. Gera a nase aki na Kòrsou riba 31 di mei 1958. El a bira hopi konosí den deporte di vòlibòl, pero ademas di esaki komo su ramo di deporte faborito, tambe el a praktiká atletismo, sòftbòl i tènis.
Den deporte di vòlibòl el a kolekshoná un kantidat impreshonante di título komo kampion.

...Geraldine Dania-Martina...

Karera komo deportista:
Gera su karera deportivo a kuminsá komo mucha den e deporte di atletismo serka e trainer Wendel Prince, di Olympic, den Stadion di Rif. Pero pa motibu personal e no a sigui ku atletismo. Seguidamente el a praktiká sòftbòl den e ekipo Paradise serka Ruben Philips (dfm), Sonny Sparing (dfm) i Chapè Bernardus den Stadion di Suffisant, aktualmente Stadion Odulio Willems. El a hunga den Kampionato Hubenil Stimulans.
E deporte di tènis Gera a praktiká serka Papa Vos na Stadion di Suffisant i despues serka Rick Phelipa na Mundu Nobo i tambe Lulu Salas. Ku tènis Gera a sali kampion ‘single’ i kampion dòbel miksto huntu ku Reginald Agard. Despues di esei Gera a bai praktiká e deporte ku kua el a logra mas éksito, esta vòlibòl.

Logronan ku tènis:
- Kampion single dama.
- Kampion dòbel miksto (Gera/Reginald Agard).

...Xaverianen kampion di 1981/1982, ku Gera dilanti di dos na man robes...

Den vòlibòl:
Gera a kuminsá praktiká e deporte di vòlibòl for di skol ku su 11 aña na Fatima College. Na aña 1971, ku 13 aña, Gera a drenta e ekipo "Volley Master" di yùfrou Aminta Sprockel di su skol Fatima College. Den Volley Master el a hunga 1 aña so.
Despues na aña 1972 Gera a pasa pa e gran ekipo di su bario Suffisant, ku ta Xaverianen. Na aña 1975 Gera a hunga den torneo di vòlibòl di skolnan ku Stella Maris College, di kua su skol a sali kampion. Na 1976 el a bira promé biaha kampion di Kòrsou ku su ekipo Xaverianen.
Na aña 1979 el a bai hunga un torneo na Costa Rica ku Xaverianen i nan a sali kampion. E ekipo su arma fuerte tabata sinta den atake, manehá dor di Gera. Den Xaverianen el a krese i bira un di e mihó vòlibolistanan den historia di nos vòlibòl.
Durante Gera su karera el a partisipá den hopi kampionato internashonal di vòlibòl e.o.:
- 1977 Kampionato Norceca na Sto. Domingo.
- 1978 Weganan CAC na Medellín Colombia.
- 1981 Kampionato Norceca di México.
- 1982 Weganan CAC na Santiago Cuba.
- 1985 Kampionato Norceca na Sto. Domingo.
- 1986 Weganan CAC na Rep. Dominicana.
- 1991 Caribbean Cup na Sürnam.
- 1993 Klasifikatorio na Puerto Rico.

Na aña 1994 Gera a retirá despues di 25 aña komo hungadó aktivo. Pero kuater aña despues, na 1998, el a hasi su regreso ora ku nan a lanta un ekipo bou di nòmber di Twister i nan a bira kampion Klase-A i despues 2x kampion di Klase Superior.
Na aña 2003 el a biaha komo ‘assistant coach’ di selekshon hubenil femenino di Antia pa Caribbean Cup i a regresá kas komo sup kampion.

..Selekshon di vòlibòl na Weganan CAC Havana ’82. Gera Martina na man drechi...

Paisnan kaminda Gera a hunga vòlibòl:
Aruba, Boneiru, Sint Maarten, Sürnam, Rep. Dominicana, México, Puerto Rico, Cuba, Colombia i Venezuela.

Logronan personal:
- 3x Vòlibolista di Aña kampionato di Kòrsou.
- 1978 Deportista Femenino di Aña di C.S.F.
- 1984 MVP di Kampionato Antiano.
- 1991 Deportista Femenino di Aña di C.S.F.

Logronan ku ekipo:
- Kampion di Kòrsou ku Xaverianen: 1976/ 1978/ 1981/ 1984/ 1985/ 1986/ 1989/ 1990/ 1991.
- Kampion di Antia ku Xaverianen: 1976/ 1978/ 1985/ 1989/ 1990/ 1991.
- 1979 Kampion Torneo na Costa Rica ku Xaverianen.
- 1998 Kampion Klase A ku Twister.
- 1999 Kampion Klase Superior ku Twister.
- 2000 Kampion Klase Superior ku Twister.

Logro komo dirigente tékniko:
- 2003 Sup kampion ku Selekshon Hubenil femenino di Antia den Caribbean Cup.

Rekonosementu risibí:
- 1995 "Nèt di oro" 40 aña CUVOBO.
- 1997 Plakat di Geoffrey Goede.
- 2012 Instalá komo Miembro di Honor di CUVOBO.

...Hóben Gera Martina (agachá man robes) kampion di vòlibòl eskolar ku Stella Maris na aña 1975...

...Gera den atake ku su ekipo Xaverianen...

...Selekshon Antia Hulandes na NORCECA 1981 na México. pará d.r.p.d.: Jossy Martina, Maritza Daal, Signa Martina, Poppy Cornelia, Yola Leito, Poppy van Lamoen, Jeritsa Martina, Ramiro Hart. Agachá: Maria Ewaldos, Gera Martina, Mieke Wernet, Imogene Pieternella, Elaine Martina i Ethlyn Franken...