WILLEMSTAD.- Germain Brunken, propietario di Strak Strak Barbershop kende pa 20 aña ta organisando presentashon musikal ku gruponan di tambú i aguinaldo dilanti di su negoshi na Ruyterkade a risibí ayera den transkurso di dia un dekreto di Minister di Hustisia kaminda ta informe ku lo e no risibí pèrmit mas pa organisá eventonan musikal dilanti di su negoshi.

Manera ta konosí, despues dje insidentenan ku e pareha durante di e presentashon di ‘Grupo Sorry’ na Doezini Barbershop den Prinsenstraat na Punda a surgi un situashon kaminda pueblo a kuminsá ta pidi pa tuma medida pa algu asin’aki no bolbe tuma lugá. A bai dje leu ei ku a pidi pa tuma medida kontra di esnan ku a pidi pèrmit i tambe kontra dje agrupashon musikal.

Den e argumentonan, 5 punto, skibi riba e dekreto di Minister di Hustisia tin pone ku tin sufisiente motibu pa den kuadro di mantenshon di órden públiko ninga e petishon di pèrmit.

Ta hasi menshon ku riba e dia ku ta pidi e pèrmit pa e presentashon musikal ku e Hefe di Polis di Punda ta argumento ku a keda komprobá ku e área di Punda no ta adekuá pa tene tipo di aktividatnan asina, debí ku e pasashi di tráfiko, órden públiko i ta keda pone na peliger.

Mas aleu e dekreto ta indiká ku a keda komprobá ku e tráfiko ta keda pega na altura di Strak Strak i ta stroba transporte públiko. Dado kaso tin un kalamidat no tin pasashi liber pa e instansianan ku mester duna ayudo.

E último punto ta indiká ku e negoshi ta situá den bisindario di un pòmp di gasolin i ku ora áwaseru kai, tur hende ta bai skonde bou dje dak di e pòmp di gasolin, loke ta pone por eksistí un peliger pa kandela.

E dekreto ta brinda Germain Brunken, e oportunidat pa den 6 siman e por entrega un karta di opheshon na Ministerio di Hustisia.

‘DEN E BEMBE’ a kombersá ku Germain Brunken ayera tardi i el a sali na indiká ku lo e bai tuma paso kontra dje echo ku a ning’e pèrmit, despues ku pa 20 aña kaba e ta organisando evento musikal durante fin di aña.

‘Lo mi dal un stap, mi no sa kuantu, pero lo mi dal un stap’, asina Brunken a kuminsá splika. ‘Lo mi aserká Minister mes pa komprondé for di dje mes kiko ta e argumentonan. Nan ta kitando un aktividat ku tin 20 aña ta tumando lugá einan. Ta reklamá e asuntu di pòmp di gasolin, e pòmp tin mas ku 20 aña einan. Tin un snek den lomba dje pòmp ku ta kushina tur dia. Semper nos a ‘zet af’ e pòmp. Den e pèrmit ta eksigí 14 bari oraño pa por sera kaminda. Nos ta kumpli ku esei i semper a ‘zet af’ e tráfiko pa bus ku konvoi por pasa trankil. Nos tin koperashon di doñonan di e pòmp di gasolin ku ta sera esaki pa 7’or di anochi pa dje forma ei nos aktividat por tuma lugá’.

Finalmente Brunken a indiká ku ‘Bo tin ku kue e baka na su kachu. Loke Minister ta bezig kuné no ta ‘fair’. Mi tin dos fecha mas pendiente pa e aña aki. Nan ta bai tende mi stèm sigur!’.