KRALENDIJK -- Gezaghebber Rijna a bisa ayera tardi den un konferensia di prensa ku ta konosí ku e variante omikron di e vírus di corona a yega Boneiru. Departamento di Salubridat Públiko a deklará den e siman ku ta tras di lomba ku nos mester tene kuenta ku e kantidat di kontagio ku e variante di omikron ta subi lihé. Delaster dianan a mira klaramente un oumento di e kantidat di hende den isolashon, esta di persona ku por pega otronan.

“Awe nos tin 262 hende den isolashon na kas relashoná ku kontagio ku corona. Esaki ta basta mas ku delaster simannan. E kantidat di kontagio nobo den e delaster dianan ta subi klaramente. Tin 4 hende hospitalisá ku COVID-19. Di kada 10 persona ku a a pega ku e vírùs rùim un siman pasá, 5 – 6 persona a pega ku e variante di omikron. Nos ta ferwagt ku e kantidat di kontagio awor akí ya kaba ta muchu mas haltu”, Rijna a trese dilanti.

“Salubridat Públiko ta tene kuenta ku nos lo bai tin un pik atrobe den e kantidat di kontagio. Un pik por nifiká ku mas hende ku pega ku e vírùs mester bai hospital na nos isla. Preshon riba hospital i otro partinan di kuido ta subi e ora ei. P’esei for di desèmber 2021, Salubridat Públiko ta dunando mas tantu persona posibel e chèns pa nan haña e angua di buster lihé pa nan ta mihó protehá. Salubridat Públiko ta duna oportunidat tambe na personanan ku no a pasa e di promé òf di dos angua di corona pa nan hasi esei ainda. Ku e angua di buster i e dos anguanan di corona e  departamento ke protehá siudadanonan mihó pa nan no bira gravemente malu si nan pega ku e variante di omikron”, Rijna a trese dilanti.

E mandatario a bisa ku e luna akí ta prolongá e oranan pa pasa angua pa personanan ku no a pasa e angua di buster òf e di promé òf e di dos angua kontra corona ainda. Ta anunsiá prolongashon di e oranan pa pasa angua e siman akí. Pa mas informashon: www.boneirukrisis.com.