WILLEMSTAD.- Parlamentario i alabes músiko, kompositor i kantante, Gilbert ‘Gibi’ Doran ta otro dje miembronan di ‘primera ora’ di AMAK ku tabata presente durante di e kombersashonnan ku Minister Camelia-Römer i ku ayera a indiká di ta kontentu ku por a haña otro pa sali na vanguardia primeramente di e músikonan i lógikamente di organisadónan di aktividatnan. ‘Nos ta biba den un pais multikultural i no por permití pa nos kultura wòrdu matá’, asina Doran a indiká. E ta kontentu ku Minister Camelia-Römer a habri orea pa skucha AMAK i ku e minister ta dispuesto pa yega na un akuerdo pa aktividatnan por sigui normal, manera a kustumbrá riba nos pais. Doran ta di akuerdo ku Ike Jesurun ku mester tene kuenta ku e temporada di fin di aña i ku no ta limitá e pèrmitnan pa gruponan di tambú i aguinaldo. ‘ E ta parti di nos kultura pa hopi aña kaba, nos a lanta i haña nos ku e aktividatnan aki’, asina Doran a splika. Den mesun rosea Doran a pidi pa pone atenshon na e situashon di Strak Strak Barbershop ku pa 22 aña ta organisá presentashon di gruponan di tambú, pero ku aña pasá riba konseho di brantwer a ninga su pèrmit. ‘Nos mester hasi un ehersisio pa e presentashon di tambú por sigui tuma lugá einan’, Doran a terminá bisando.