MERKA.- Glennis Grace, ta mira atras ku satisfakshon riba su partisipashon na e show di talent ‘America’s Got Talent’. E kantante di kua un di su mayornan ta yu di Kòrsou, a logra pa huntu ku 9 otro partisipante yega na e final, pero finalmente no a logra klasifiká den e Top 5.
‘Mi ta sinti mi bon, hopi trankil’, asina e kantante a deklará na RTL Nieuws. ‘Durante 6 luna dje aña aki mi bida a keda dediká na AGT i awor nos ta kla. Tur biaha ma hasi mi bèst pa presentá algu na nivel i mi ta hopi orguyoso di mi mes. E ta bon asina’, Glennis a indiká.
Pa su partisipashon na e programa Grace, 40 aña, a deliberá ku su tim di maneho merikano riba posibel tour.
‘Pa hasi esaki bo mester tin un repertorio i un base di fanátiko, pues tabata un idea magnífiko pa tin un plataforma pa presentá mi mes na Merka. Aworakí si tin pregunta di públiko pa mi tour i no solamente na Merka, esaki ta tremendo!’, Grace a terminá bisando.