ARUBA.- Djasabra último riba Freewinds a tuma lugá otro evento eksitoso organisá pa fundashon Go Cultura.
Públiko presente a disfrutá di un evento musikal di un nivel ekselente.
Esaki tabata un konsierto na benefisio di e fundashon, pa asina Go Cultura por rekoudá fondo pa por kontinuá ku su mishon importante di stimulá i engrandesé e sektor artístiko i kultural riba nos isla.
Nos ta hasi uso di e oportunidat pa gradisí prensa i tur medio di komunikashon ku a brinda nos e koperashon i espasio pa asina nos por a promové i informá Aruba di nos evento.
Agradesimentu hopi spesial na e artistanan Edjean Semeleer, Amy Sorinio, Rajiv Landaeta i Rob Meister ku a duna tur di nan parti pa a hasi esaki un evento sumamente special i memorabel.
Danki grandi na e Freewinds i the Freewinds Band ku ta aliadonan sumamente importante no solamente pa nos fundashon pero pa tur otro fundashon i organisashon riba Aruba pa mas ku 30 aña kaba.
Por último, un danki inmenso na e gran públiko ku a kumpra karchi pa disfrutá di e espektákulo i ku a kontribuí tambe na e kousa hopi importante di nos fundashon.
“Go Cultura” lo kontinuá ku su kompromiso i esfuersonan pa realmente pone kultura i kreatividat na e kurason di e desaroyo sostenibel di nos isla.
Pa mas informashon di e fundashon, por tuma kontakto na telefòn 583-0808 òf bishitá e wèpsait: gocultura.org Danki un bes mas!