WILLEMSTAD.- Kiko nos a siña ayera? ‘DEN E BEMBE’ a sigui tur diskushon ku tabatin ayera riba retnan sosial relashoná ku e situashon di Pietermaai pa loke ta trata pèrmit i molèster di zonido. E loke ku mi a antisipá for di mainta a resultá e bèrdat atardi despues dje rueda di prensa di Gobièrnu. Gobièrnu a indiká bon kla ku mester respetá lei!. Tantu Minister Suzy Camelia-Römer i Minister Steven Martina, kada un pa loke ta trata nan kartera a duna informashon i splikashon. E echo ku mester respetá lei i ku gobièrnu ta habrí pa hiba diálogo riba e tema aki i spesialmente pa e área di Pietermaai ta un komienso i tantu e doñonan di negoshi di Horeca komo AMAK mester prepará nan mes bon pa bai e diálogo aki. Tin diferente punto ku si presentá nan bon por logra pa Gobièrnu hasi adaptashon na nan leinan, pero esaki den e márgen ku ta posibel i respetando e derechi di e siudadanonan ku ta biba den e área. E distrito di Pietermaai manera e ta keda yama ta un área ku ta bai sigui desaroyá i e kombinashon di pueblo ku empresanan mester bira e kombinashon perfekto pa e desaroyo. Ayera nos a tende yen komentario riba si ta ulandes òf ta Yu di Kòrsou ta esnan ku ta reklamando e molèster di zonido, esei no mester ta e ‘issue’, mester buska informashon riba e molèster di zonido i wak kon por aliviá esaki pa dje forma ei e pèrmit pa muzik bibu pa e diferente empresanan por keda aprobá. E situashon di Pietermaai mester bira un modèl tambe pa tur otro área rònt Kòrsou kaminda tin negoshinan di Horeca ku lo kier tin un pèrmit pa muzik bibu. Músikonan i kompanianan di zonido ku ta duna servisio na e bandanan mester reuní pa dje forma ei nan tambe kumpli ku e reglamentu ku tin. Si ke diskutí riba e kantidat di desibèl, bo mester prepará bo mes bon i pidi reunion ku e instansianan gubernamental pa por trese bo opheshonnan dilanti. E oportunidat a habri awó i mester probechá dje situashon ku Gobièrnu ta habrí pa diálogo. Nos ta kombensí ku na final tur dos banda lo ta satisfecho ku e resultado di e diálogo ku tin ku tuma lugá.