WILLEMSTAD.- Fundashon Kultural Seú Kòrsou ta optimista ainda ku Gobièrnu lo duna su aporte na selebrashon di Seú 2018. Ayera tardi e organisashon a tene un rueda di prensa kaminda ku e preokupashon prinsipal tabata e echo ku Gobièrnu a kita 75 mil florin for di e supsidio ku e organisashon ta risibí pa organisá e selebrashon di Seú. For di 250 mil florin ku anualmente e organisashon ta risibí, awor ta 175 mil ta loke ku Gobièrnu a pone disponibel pa nan e aña aki. FKSK ta lamentá e desishon aki i te hasta tin miedu ku esaki lo ta prinsipio dje fin di un dje fiestanan di selebrashon kultural di Kòrsou. Si na 2007 nan a logra di yega e máksimo di 8020 persona partisipando na e Marcha di Seú, pa e último añanan nan a keda di un forma konsistente na algu mas ku 4 mil partisipante. E selebrashon di Seú no ta solamente un fiesta, pero ta tambe un momentu pa eduká e hóbennan den e área kultural. ‘Nos ta sembra i bo ta mira e kosecha’, indikando e kantidat grandi di hóbennan ku ta partisipá na e Marcha di Seú. Na final dje rueda di prensa, Sr. Lionel Jansen a indiká ku nan ta kombensí ku Gobièrnu lo duna su aporte pa tur e eventonan por keda organisá.