Edishon Di Imprenta

Gobièrnu a kuminsá tuma paso preventivo pa atendé kapasidat CMC

Komparti:

WILLEMSTAD.- Mirando e situashon preokupante na Curaçao Medical Center (CMC), Promé Minister Gilmar Pisas, den kuadro di su responsabilidat pa maneho di krísis, a duna instrukshon pa monitor e situashon aktual di aserka i koordiná ku e instansianan relevante riba posibel medidanan preventivo pa garantisá salubridat públiko.

Den e kuadro aki, ayera mainta a tuma lugá un reunion na e Crisiscenter na Rio Canario, kaminda representantenan di CMC, Ministerio di Salubridat Públiko, Medio Ambiente i Naturalesa (GMN), Brantwer, Kuerpo Polisial Kòrsou (KPC) i e Koordinadó Nashonal di Krísis a reuní pa evaluá e situashon i deliberá riba posibel solushonnan.

Durante e reunion, maneho di CMC a deklará ku, apesar di e preshon aktual riba e kapasidat hospitalario di CMC, kuido médiko agudo ta keda garantisá pa pueblo di Kòrsou. Esaki ta nifiká ku no tin motibu inmediato pa pániko. Den kaso di un emergensia médiko, pashèntnan por sigui konta ku e kuido nesesario na CMC. Si tin e nesesidat aktualmente pa redusí e preshon riba e kapasidat hospitalario di CMC.

A palabrá ku Ministerio di GMN lo eksplorá e posibilidat pa laga transferí mas o ménos 18 te 20 pashènt ku aktualmente ta hospitalisá na CMC, i ku nan kondishon médiko ta permití esaki, na otro entidatnan di kuido.

Ademas, lo sigui papia ku diferente instansia i proveedórnan di kuido médiko den promé, di dos i di tres liña, pa asina koordiná kon por mehorá e fluho di pashèntnan i redusí e preshon riba CMC.

Otro punto importante ku a sali for di e reunion ta e nesesidat di intensifiká komunikashon i konsientisashon públiko. Den e kuadro aki, Promé Minister Pisas ta hasi un yamada na komunidat di Kòrsou pa kontribuí na e esfuersonan preventivo, evitando situashonnan ku por resultá den aksidente i, konsekuentemente den hospitalisashon. Esaki ta inkluí komportashon responsabel den tráfiko i komportashon ku violensia. Tambe mester hasi uso adekuá di kuido médiko, konsultando ku dòkter di kas i HAP mas tantu posibel pa kehonan ku no ta urgente.

Den kaso di un emergensia médiko, ta importante pa buska asistensia inmediato.

Promé Minister Pisas ta sigui monitor e situashon den estrecho kolaborashon ku Minister di GMN, sr. Tyron Boekhoudt, i e instansianan kompetente, ku e meta pa prevení un eskalashon di e situashon i garantisá kontinuidat di kuido médiko pa pueblo di Kòrsou.

 

Artíkulonan relashoná

Laga un komentario