WILLEMSTAD.- Gobièrnu di Kòrsou a hasi entrega di un sertifikado di apresio na e hóben atleta Matthew Sophia di 17 aña, kende a gana dos medaya di plata den Kampionato Europeo pa atletanan bou di 20 aña. El a gana medaya riba e disiplina di kareda ku opstákulo (110m Hurdle) komo tambe relevo 4x100m. E atleta Matthew Sophia, huntu su mayor i alabes coach Kurt Sophia i tambe su mama sra. Gladys Sophia, coach Rudsel van Lamoen (The Glory Runners) i presidente di Federashon di Atletismo sr. Caimin Douglas a keda invitá pa un bishita na Fòrti. Durante e enkuentro Promé Minister sr. Gilmar “Pik” Pisas i Minister di Enseñansa, Siensia, Kultura i Deporte (ESKD) sr. Sithree “Cey” van Heydoorn a hasi entrega di un sertifikado na Matthew Sophia i a duna un ‘pin’ na su mayornan, coach i Caimin Douglas.

E hóben Matthew Sophia a partisipá na Kampionato Europeo U-20 na e siudat di Estonia, Tallinn, kaminda el a konkistá e di dos lugá den e disiplina di kareda ku opstákulo (110m Hurdle) i tambe tim di relevo. Gobièrnu di Kòrsou ta sumamente kontentu i ta felisitá e Federashon di Atletismo, pero en espesial e tim di The Glory Runners i Matthew Sophia ku e logro akí.

Momento ku Matthew Sophia a risibí un ‘pin’ di bandera di Kòrsou serka Promé Minister Pik Pisas.