WILLEMSTAD.- Den su reunion semanal di djárason último, gobièrnu di Kòrsou den su totalidat a ekspresá su gratitut inmenso pa e inisiativa di Fundashon Bon Intenshon pa a drenta un “joint venture” ku Gobièrnu pa huntu hasi e selebrashon di Dia di Bandera tur afó.
Minister di Enseñansa, Siensia, Kultura i Deporte ta gradisí Fundashon Bon Intenshon inmensamente pa e kontribushon balioso na e eksitoso selebrashon di nos Dia di Bandera dia 2 di yüli último. ‘E tremendo Festival di Pueblo a kai na agrado total di nos pueblo.
Pueblo di Kòrsou a akudí masalmente na e evento i a disfrutá inmensamente.
Ku beneplásito gobièrnu a tuma nota ku Fundashon Bon Intenshon ta bai kontinuá ku e aporte balioso aki den futuro selebrashon di nos dia di Bandera.
Gobièrnu di su banda ta hasi tur lokual ta posibel pa nos mantené e bon lasonan ku
Fundashon Bon Intenshon pa huntu nos sigui traha riba aktividatnan ku ta elevá i promové e sentido di union bou di nos pueblo!
Fundashon Bon Intenshon: danki, danki, danki na nòmber di pueblo di Kòrsou!’, asina e komunikado emití pa Minister di Enseñansa, Siensia, Kultura i Deporte ta terminá.