WILLEMSTAD.- Den kuadro di aña di Ka’i òrgel, Gobièrnu di Kòrsou ta organisá un tayer titulá  “Bin Siña toka Wiri”. Wiri ta un instrumento di perkushon ku ta kompañá e Kaha di òrgel.
Manera ta konosí, mayoria instrumento di perkushon di nos region ta originá for di Afrika i Wiri tambe.
E sonido skèrpi di kompañamentu rítmiko di Wiri ta hasi ku nos Kaha di òrgel ta haña un toke diferente i original. Ku zonido i riba ritmo di wiri e kaha di músika ta animá nos hendenan pa baila riba ritmo i melodianan di nos herensia musikal Kaha di òrgel.
Pa pone atenshon tambe riba nos Wiri ku ta un instrumento importante Komishon di aña di Kai òrgel a bini ku e tayernan akí.
E tayernan ta tuma lugá den e patio di Teatro Luna Blou na Havenstraat 2-4 Otrobanda i na Museo Ka’i òrgel na Leliënberg.
Sr. Elvio “Buchi” Grotestam, mihó konosí komo “Buchi Wiri Oro”, sr. Danick Rosenda i Amaliangerick Sambre mihó konosí komo ‘Yecki’, ta esnan ku ta enkargá pa hasi traspaso  di e konosementu akí pa tur ku inskribí.
Pa hasi bo partisipashon posibel, registrá na Fundashon Kas di Kultura serka sr. Rubertico Balentien na number di telefon 434-7355 of 514-9444.
Inskribí trempan te ku djarason 20 di novèmber 2019 paso lugánan ta limitá. Despues di inskripshon lo duna informashon general na tur interesado.