WILLEMSTAD.- Ayera tardi durante e rueda di prensa semanal di Gobièrnu di Kòrsou, Minister Sra. Suzy Camelia-Römer i presidente di AMAK, Asosashon di Músiko i Artista di Kòrsou, Sr. Manfred ‘Feco’ Gomes a firma un kombenio pa prevenshon di daño di oido den presensia di representante di Quota Club, organisashon ku ta konsientisá riba kuido di oido. E kombenio ta enserá ku e Ministerio di Salubridat, Medio Ambiente i Naturalesa huntu ku AMAK tei duna nan aporte pa prevení daño di oido dor di muzik duru, esaki dor di tuma medidanan efektivo di prevenshon. Nan empuhe lo ta pa e públiko ku asistí na eventonan musikal presentá dor di miembronan di AMAK por disfrutá na un manera sigur di e músika ku ta keda presentá. E afspraknan entre partidonan a keda fiha den e kombenio ‘Preventie gehoorschade Muzieksector’. Riba foto nos por apresiá momentu ku Sr. Feco Gomes ta firma e kombenio den presensia di Minister Sra. Suzy Camelia-Römer i representante di Quota Club.