CARACAS, AP.- Míles di manifestante opositor a sali den kayanan na ost di Caracas pa apliká mas preshon kontra presidente Nicolás Maduro i mustra e pueblo su rechaso na e krísis di servisionan públiko. Míles siguidó di e gobièrnu tambe a dominá e kaya den sentro di e kapital pa sostené e mandatario.
“Nan no por ku nos, hamas”, asina Maduro a afirmá den su diskurso dilanti di míles di funshonario públiko i di e partido, bistí ku kamisa kòrá. Nan a konsentrá alrededor di e palasio presidensial.
Maduro a pidi e venezolanonan pa prepará pa enfrentá “atakenan” eventual nobo, kontra servisio públiko i a indiká ku e sistema eléktriko a bira víktima di un terser atake ku impliká pa un “vírus” den e sistema di kòmpiuter.
“Nos ta den un emergensia eléktriko”, asina e gobernante a ekspresá, pidiendo e venezolanonan pa spar koriente. E presidente a anunsiá anteriormente ku lo mantené un plan di rantsun di koriente miéntras e servisio ta stabilisá.
E gobernante a probechá di e oportunidat pa felisitá Asamblea Konstituyente, kual a retirá inmunidat di e dirigente opositor i presidente di Kongreso, Juan Guaidó e siman aki.
E dirigente, kende a wòrdu rekonosé komo presidente interino di Venezuela pa mas di sinkuenta pais, a pidi e venezolanonan pa no kustumbrá biba entre e fayonan di koriente i awa. El a organisá un serie di protesta nobo pa djárason awor na Caracas i den otro siudatnan.
![](https://extra.cw/wp-content/uploads/2019/04/guaido-2-300x200.jpg)