MADRID (AFP).- E minister saudita di Asuntunan Eksterior, e prens Faisal Bin Farhan a gradisí Spaña, Irlanda i Noruega pa a rekonosé Palestina komo Estado, loke na su opinion “ta pone nan na e banda korekto di historia”.
“Nos tei aki pa yama danki na Spaña pa a duna speransa na momentonan hopi skur”, segun e minister a bisa na periodistanan na e kapital spañó, flankiá pa su koleganan di Jordania, Qatar, Turkia i Palestina, promé di a reuní ku e minister spañó di Eksterior, José Manuel Albares.
Gobièrnunan dje tres paisnan djamars a hasi ofisial nan rekonosimentu na e Estado di Palestina, ku e intenshon pa otro nashonalnan europeo imitá nan, den un medida ku a kousa rabia serka Israel.
Promé di a papia ku Albares, e ministernan a reuní ku e presidente dje gobièrnu, Pedro Sanchez. “Spaña lo sigui traha pa otro paisnan europeo rekonosé e Estado Palestino i, ku e ‘sosio i amigunan árabe’, pa normalisá e relashonnan di e paisnan Arabe ku Irlanda”, segun el a bisa.
Ku e desishon di djamars di Spaña, Irlanda i Noruega, Estado Palestino awor ta aseptá pa 145 pais di e 193 Estadonan miembro di Nashonalnan Uní, un lista di kua ta ousente e mayoria di paisnan di Wèst Europa, Nort Amérika, Australia i Hapon.
