WILLEMSTAD.- Despues di e presentashon na prensa djabièrnè 27 di sèptèmber último, porfin gerensia di Excellence ta anunsiá e  debut di Excellence na pueblo di Kòrsou.
Esaki ta tuma lugá, djadumingu 27 di òktober na Riffort Village.
Awa Claro Caribbean Water i Renaissance Mall & Riffort a uni forsa pa hasi e gran debut di e agrupashon musikal  hóben aki posibel i ku ta bai trese un  variashon den farándula  tokando muzik di tur género i na nivel musikal haltu.
Excellence a haña preparashon musikal intensivo serka maestro Gedion Chandler i ta kla pa enfrentá kualkier reto. Excellence lo presentá na fiestanan popular, tantu pa e género di ritmo kombiná, pa e género di bailadores i na fiestanan privá.
Pa fiestanan privá, semper tin petishonnan pa un variashon musikal, i Excellence lo ta e eskoho korekto.
Pues e lokalidatnan por ta hopi diferente i e repertorio amplio ta adekuá pa kada situashon.
Pa lokual ta trata e fiestanan di fin di aña, Excellence, lo tin un repertorio diferente i variá, pa krea e ambiente nesesario, durante selebrashonnan pa empleado di kompanianan i institutonan, konforme e deseo di e promotornan.
For di e baul amplio, ku e músikonan hóben aki tin, semper bai lo por hasi un eskoho, segun e okashon, pa agregá na e repertorio aktual.
Kòrsou tin nesesidat di agrupashonnan musikal, ku por aktua pa tur gremio musikal.
E debut aki ta konta ku partisipashon di  e popular dj RO1, ku pa e okashon aki tambe, lo trese un repertorio, ku sigur lo kai na agrado di esnan ku tei presente.
E gran debut ta tuma lugá 27 di òktober, di 7.30 pm pa 10.00 pm  na Riffort i entrada ta grátis pa  tur hende ku kier pasa un ratu kontentu disfrutando di muzik na nivel haltu di Excellence i DJ RO1.
Pues un invitashon na un i tur pa e debut di Excellence, djadumingu  27 di òktober entre 7.30 pa 10’or di anochi na Riffort.