WILLEMSTAD.- Un komedia humorístiko skibí pa: Dudy Pinedo, e mesun outor ku lo bai den historia ku a skibi un di e mihó komedianan den siglo 21... “Ata a lubidá riba MAI”
Despues di ocho aña e ta bèk ku otro obra teatral nobo titulá: “E Herensia di Shon Kathan”.
Un historia basa riba tres ruman, nan ta triyiso, tur tres a nanse mesun dia algun minüt di diferensia.
Nan mama no tabatin moda di kria nan na chikitu, el a disidí di repartí nan pa tres diferente famia
Na edat mas grandi dos di nan so tabata konosé otro, Baby i Alicia.
Baby ta un muhé pa su kuenta, Alicia a wòrdu kriá serka un famia ku mas moda, el a lanta ku yen di idea den kabes, i Ingrid tabata un humilde ménos rekurso pa biba.
Riba un dia Alicia ku Baby a wòrdu yamá pa presentá dilanti Notario, kaminda nan a bin haña di tende ku tin un Herensia pa nan, pero den e akta ta ankra e kondishon ku nan mester tin kontakto ku otro. Si no nan no por risibí e herensia.
Kon Baby i Alicia lo hasi topa nan otro ruman muhé Ingrid ku nan no konosé pa haña nan herensia? Nan lo bòltu Kòrsou boka bou, sakudié pa topa nan ruman?
Un historia impaktante, yen di suspenso i ku lo pone bo hari bo barika yen.
Bou di direkshon di e mihó aktris internashonal nominá na aña 1979, Jessica Damon.
Lo e tin e batuta pa promé bia komo direktor di un tremendo obra teatral.
Interpretá pe propio Dudy Pinedo, ku lo interpretá tres personahe.
Kompañá pa Mientje Baromeo, Sharine Sambo, Aisha Gressman, Anais Baromeo, Rignald Lodevika i Everets Winklaar.
Funshonnan lo ta djabièrnè 3, djasabra 4 pa 9’or di anochi i djadumingu lo tin dòbel funshon 3’or di atardi i 8’or di anochi den Teatro Luna Blou.
Buska bo karchi na Mensing’s Caminda, 24 Uit De Muur i riba dianan di funshon for di 4’or di atardi na takia di Luna Blou. Pa reservashon por yama 462-2209.