WILLEMSTAD.- Awe nochi 30 komposishon lo keda presentá pa 13 agrupashon rítmiko den e gran final di Kantadó Mayó 2019. E festival kaminda e género di músika Seú ta den spòtlait lo tin su final tan antisipá den Klup di Shell. Pa Fundashon Kultural Seú Kòrsou e espektativa ta haltu pa loke ta trata e final despues di 3 dia preliminar kaminda partisipantenan a presentá nan komposishon nobo den un ambiente úniko kaminda fanátikonan a pèrkurá pa tremendo ambiente. Pa awe nochi ta spera ku tur agrupashon musikal lo duna un tremendo respaldo musikal na e kantantenan ku lo kompetí pa final di anochi nos korona nos Kantadó Mayó 2019. Tur klase di éksito na tur e partisipantenan i ku e mihó gana!. Riba foto nos por apresiá algun momentu durante di sakamentu dje órden di presentashon pa awe nochi. Mas abou riba e página bo por tuma nota dje órden di presentashon di banda i kantantenan.