WILLEMSTAD.- Djasabra, 10 di novèmber próksimo e kantoutor yu di Kòrsou, Ced Ride lo tin un konsierto den Because Entertainment Center.
E konsierto ku ta hiba di título ‘Mi lenga Folklor’ ta referí na su mas resiente produkshon musikal.
Un komposishon kaminda Ced ta pone énfasis riba e frase ‘Ma Nase ku mi Lenga na Boka’, un komposishon fásil ku grandi i chikí por kaptá i ku ta duna honor na papiamentu, nos bunita idioma.

‘DEN E BEMBE’ a kombersá ku Ced Ride i su pashon pa promové papiamentu.
“Papiamentu mester ta promové pa un i tur ku ta biba den e nashon papiamentu
komprondé i na siña papi'é.  Den historia Real nos a heredá un algu ku mundial no ta eksistí. P’esei nos mes na promé lugá mester tuma rienda di e promé balor ku nos a heredá ku ta nos lenga  papiamentu.
Mester  dun’é su balor meskos ku e spañó ta duna esun di dje, meskos ku e ingles ta duna esun di dje meskos ku e ulandes ta duna esun di dje igual ku e chines, e hindú, e portugues i sigui asina ... nos di e nashon papiamentu  mester establesé nos komunikashon sosial papiamentu.
E regla i lei kultural ta su fuente di historia kaminda por bebe su awa seka salu di su herensia...ku ekselensia”

Pa e konsierto aki Ced Ride lo ta presentando ku su propio orkesta. Karchi ta na benta na Mensing’s Caminada i na Beep Beep Rio. Pa reservashon di karchi bo por yama 510-9414