WILLEMSTAD.- Mañan djabièrnè, 13 di desèmber, Kòrsou lo keda deleitá ku un grandioso konsierto ‘Christafari LIVE in Curaçao’. E konsierto aki ta keda presentá komo un regalo na Kòrsou i ta grátis.
Aparte di presentashon di artistanan lokal lo tin komo artista internashonal e tan gusta banda di reggae ‘Christafari’.
‘Christafari’ ta un banda ku atraves di músika i baile ta trese e mensahe di amor i redenshon dor di kompartí nan eksperensia den mundu di droga, alkohòl i bida di ‘gang’ i kon nan a logra sali for di esaki.
E integrantenan di e banda ku ta bini di diferente pais a dediká nan bida pa biaha rònt mundu, bishitando hopi bia paisnan peligroso pa kompartí e bunita mensahe, miéntras nan ta kubri nan mes gastunan di pasashi i no ta kobra nada pa e konsiertonan ku nan ta duna.
Christafari lo ta na Kòrsou pa 5 dia kaminda nan lo duna tayernan di entre otro di músika i maneho, bishita prizòn, duna konsierto na skolnan avansá i lo konkluí nan estadia ku un tremendo konsierto grátis djabièrnè awó kaminda henter pueblo di Kòrsou ta keda kordialmente invitá.
E konsierto lo tuma lugá na edifisio di Iglesia House of Worship na Erosweg 52 i lo ta den un ambiente festivo ku hopi presentashon, baile i músika. Pa mas informashon por yama 515-2997 òf 520-0105.