WILLEMSTAD.- Durante wikènt ku ta tras di lomba e ensayonan a sigui pa loke ta trata ‘Tumba Revival Festival’.

‘DEN E BEMBE’ a kombersá ku Gregory Colina, e direktor di e orkesta ku lo ta kompañando e Reinan di Tumba di 2001 te ku 2020. Gregory tabata satisfecho kon ensayonan ta kanando.

Ku eksepshon di 2 tumba ku falta pa pasa, e orkesta a pasa tur sobrá i for di ensayo bo por a mira kaba ku tin algun dje tumberonan ku sigur ta disfrutando un mundu di e ensayo.

Pa e siman aki lo kaba di pasa e dos tumbanan ku falta pa despues kuminsá ensayá ku e sekshon di brass pa dje forma ei ta kla pa wikènt pa por hasi un ensayo general kaminda lo drai henter e programa segun esaki mester tuma lugá riba djabièrnè, 12 di febrüari 2021.

ESPEKTATIVA

Espektativa pa e anochi di ‘Tumba Revival Festival’ ta basta haltu, ta hopi ta esnan ku ta buskando informashon di kon e programa ta hinka den otro i kon nan lo por mira e konsierto.