PARIS, AP.- Un kantidat chikitu di manifestante a marcha den kayanan di Fransia djasabra durante e di 21 fin di siman konsekutivo di protesta di grupo Chaleko Hel.
Polis antidisturbio a rondoná algun manifestante i a tira un kartucho di gas lakrimógeno riba un kaya, pa impedí akseso di otro manifestantenan.
Den un di e otro protestanan ku a sosodé djasabra den diferente parti di e pais, polis a tira gas lakrimógeno na Normandia, den un konfrontashon ku manifestantenan ku a sende vários kònteiner di shushi na kandela i kousa kandela na vários parti mas.
E Ministerio di Interior a señalá ku 22.300 manifestante a partisipá den e mobilisashonnan na nivel nashonal i 3.500 na Paris, segun indikashon di prensa. E sifranan tabata muchu mas abou kompará ku den komienso di e protestanan riba 17 di novèmber. E movementu ta purba haña hustisia sosial i ekonómiko kual ta representá un desafio pa presidente Emmanuel Macron.
Macron a organisá un debate nashonal pa atendé e preokupashonnan ekspresá pa e manifestantenan kual a kuminsá den yanüari. E temanan ta inkluí pèrdida den kalidat di bida, stankamentu di salario i desempleo haltu.
