WILLEMSTAD.- Djasabra último grupo di Karnaval Hubenil ‘Little Twinkles’ a presentá su trahe pa Karnaval 2018 na miembronan i públiko ku tabata presente den “Kidi’s Park” na Sambil.
E grupo pa 2018 lo tin tres sekshon, sekshon gosadera, sekshon ‘mira mi prònk’, miéntras ku sekshon ‘Zuai bai bini’ ku ta Little Twinkles su arma sekreto lo keda revelá dia di Marcha Hubenil.
Pa 2018 Little Twinkles a skohe e tema ‘Welcome to the City of Happiness’. E lema di e grupo ta pa promové alegria unda ku Little Twinkles presentá, loke a inspirá pa krea e fantasia pa den 2018 por sigui bria tur dia.
Komo grupo nan ke mustra kon importante ta pa nos muchanan ta felis den un medio ambiente salú i esei te motibu di kon Little Twinkles ta invitá bo na su pais di alegria, un paraiso di positivismo kaminda huntu lo bai selebrá nos fiesta di mas gusta, nos dushi Karnaval.
Little Twinkles ke kontagiá Kòrsou kompletu ku nan entusiasmo, nan ke baila, kanta, gosa i disfrasá nan mes for di kabes te pia, p’esei nan a skohe e fantasia di ‘Troll’ ku ta nifiká alegria, e ta kolorido i ta símbolo di tur kos bunita i bon.
‘Toowoomba’, ku ta nòmber dje paraiso di Little Twinkles, ta un siudat na e parti zùit di Oustralia, kaminda naturalesa ta e sentro di atenshon i hasta tin su propio selebrashon. Un tesoro skondí ku Little Twinkles a deskubrí i kombiná ku e pelíkula ‘Trolls’ a formá e disfras ku lo keda desfilá den Marcha Hubenil 2018.
Abo mayor ku tin un yu òf mas ku tin e interes pa forma parti di un grupo dinámiko, edukativo anto yená ku ambiente. Tuma kontakto pa mas informashon na numbernan di telefòn 685-0326 òf 510-3790, via mail: Little.Twinkles.group@gmail.com òf por bishitá www.facebook.com/littletwinklesgroup dal un like, share e página i keda pendiente pa mas notisia di grupo di Karnaval hubenil “Little Twinkles”.