WILLEMSTAD.- Ayera tardi durante dje rueda di prensa na Saint Tropez kaminda a presentá e agrupashon musikal ‘Icons by Gio’ a tuma lugá tambe e presentashon dje grupo di Karnaval nobo ‘Alo Loco’.
Grupo Alo Loco ta un soño ku a bira realidat.
E inspirashon pa lanta e grupo i e nòmber a bini dor di a eksperensiá Karnaval 6 aña pasá pa promé biaha den marcha ku grupo Wepa.
E fiesta di tur fiesta esta Karnaval a hasi un impakto asina grandi ku semper e soño pa realisá un propio grupo tabata un deseo.
‘Den ‘Alo Loco’ nos ke pa bo sinti bo liber pa gosa na bo manera all out, un lokura total klaro den e sentido responsabel i positivo.
Banda di e soño aki Grupo Alo Loco tambe ta bini pa engrandesé e fiesta kultural di mas grandi di nos dushi Kòrsou.
Ya pa añanan nos dushi Karnaval ta bai atras tantu na gruponan komo partisipante p’esei Grupo Alo Loco ta apoyá tur grupo nobo ku tambe ta hasi tur posibel pa bin partisipá den Karnaval. Pasó ta huntu nos tur ta hasi Karnaval posibel’. Grupo Alo Loco ta kere ku huntu e union bou di e grupo nan por hasi e Karnaval grandi manera ántes pa no solamente pa esnan ku ta partisipá den marcha pero tambe pa e grupo grandi para kant’i kaminda òf na kas via televishon, radio, Internet pa nan tur huntu gosa di e Karnaval.
Loke ta bai ofresé i kere den dje den Alo Loco ta: Premium service (Premium Bar & Catering), Trahe espektakular i Super bon Ambiente.
Pa realisá e super bon Ambiente Alo Loco tin un kompañamentu musikal monstruoso e fenómeno ‘Icons by Gio’ huntu ku e revelashon nobo i talentoso YMG.
Ta hopi importante pa menshoná ku Grupo Alo Loco tin eksklusividat di tur e kantantenan ku ta forma parti di tur dos banda esta e kantante nan di ‘Icons by Gio’ ku ta Hunnely, Amos, DjudjuV i Stevens Daniel.
Pues tur esnan menshoná ariba ta kanta durante tur dos marcha solamente ku Grupo Alo Loco. Keda pendiente pa mas informashon, inskripshon i mas sorpresa otro siman ora ku Grupo Alo Loco ta lansa nan wèpsait i nan plataforma sosial (Facebook & Instagram).