WILLEMSTAD.- Ayera nochi na Komedor Krioyo plùs a tuma lugá e presentashon di trahe di Grupo di Seú Azalea. E grupo ku resientemente a keda lantá tin na kabes, Pastor Curtis Meris huntu ku un tim konsistiendo di Daralice Bareto Vieira, Jessica Damon, Clayten Mogen i Jarnise Aitatus.

AZALEA
E palabra  Azalea ta nifiká: Emoshonnan spesífiko, Bon Kualidatnan di Personalidat. Azalea ta un flor ku ta simbolisá Amor, Stimashon i Ternura. Su kolónan ta para pa Alegria, Union i Rèspèt. Su dushi holó, ta duna Fe, Speransa i Dushi ambiente.

META
Meta di grupo Azalea ta pa: Sigui aportá na kultura di Kòrsou; Mantené E Herensia kultura aki bibu i Formashon Kultural: Eduká grandi i chikitu riba aspektonan  kultural spiritual ku ta guia nos bida.
Un pueblo eduká ta konsiente ku banda di gosa, nos ta enrikesé nos konosementu i ta konsiente di e diferente elementonan sosial i kultural ku ta mara nos huntu pa hasi nos un pueblo di Fe di Amor, di Pas i Union; kual ta balornan importante ku por kondusí henter nos Pais na Pas trankilidat i Felisidat.

TEMA: “Bandera a Keda Tras”
Kachulero ta un persona ku ta supla kachu. Kachulero ta esun ku tin e kontròl riba e trahadónan den kunuku. Ora ku Seú tei sali fo’i kunuku, e kachulero ta kontrolá pa no lubidá nada den kunuku. Si e ripará ku ainda tin maishi pa kòrta, nan no por sali pa wapa i e Kachulero ta kuminsá supla riba e kachu i bisa: ‘Bandera a keda tras ... Bandera a keda tras’. Asina e ta yama e kòrtadónan pa nan drenta kunuku atrobe pa nan kòrta e maishinan ku no a wòrdu kòrtá. Ora nan kaba di kòrta tur maishi nan ta bai wapa Seú.
Grupo Azalea ta simbolisá E Bandera a keda tras. Ku Kòrsou, pues ku trabou no a kaba!. Nos tin FE i Speransa ku kos lo bira mihó pa Kòrsou. Ban p’e!

REINA SEU
Rocindy Brigitha lo representá Grupo Azalea komo partisipante number 7 den elekshon di Reina di Seú.
Sede di Grupo Azalea ta na Kas Parokial Sta Maria. Pa mas informashon por yama 569-4418 òf 520-3050. Kompañamentu musikal lo ta na enkargo di ‘Bena Mayó’, ántes HPA.