WILLEMSTAD.- E tema ‘Dream Catcher’ ku ta originá for di e tribu di indjan indígena ‘Ojibwe’ ku tabata biba na Merka i Canada ta e tema ku Grupo ‘E he he’ ta bai presentá den Gran Marcha di Karnaval 2019. E grupo ta nobo, pero ku ta originá for di Grupo Aloha, Grupo ‘E he he’ a presentá su trahe ayera nochi den un tremendo ambiente na Rincon Cubano. Ounke tabata hasi hopi kalor e miembronan nobo i interesadonan ku a yena Rincon Cubano a disfrutá di un tremendo presentashon di trahe ku splikashon dje tema i bon animashon musikal ku presentashon di entre otro dj Danger i Doña Elia Isenia ku a bin presentá su tumba di 2007 titulá ‘Den mi E he he’, loke ta kuadra presis ku e nòmber dje grupo. Sandy Atimadora, lider dje grupo a gradisí e spònsernan ku ta sostené e grupo i a laga e maestro di seremonia, Sherry Koeyers, presentá e 7 diferente trahenan ku e grupo lo presentá den Gran Marcha 2019. Esnan ku awe a tuma nota dje presentashon di trahe i ta interesá pa forma parti dje grupo ku lo konta ku animashon musikal di Tune por yama 511-5905 pa mas informashon. Tambe bo por bishitá e página di facebook di ‘Grupo E he he’.