WILLEMSTAD.- Ayera nochi Grupo Hats off to Dreams (HOTD) a estrená su trahe ku e tema “Royal Warriors of Wakanda”, inspirá pa e reino afro-futurístiko di Wakanda di e pelíkula Black Panther ku a hasi impakto rònt mundu. Grupo HOTD ta un grupo di karnaval nobo ku lo hasi nan debut durante selebrashon di Karnaval 2019 i tin komo meta pa engrandesé karnaval di Kòrsou ku konseptonan ku ta revolushonario i ku ta pusha límite pa ta ekstraordinario.
Durante e estreno djadumingu na Urban Venue, Grupo HOTD a ranka sali ku un tremendo show i ambiente bou di e públiko ku a bin presensiá e promé lansamentu di grupo HOTD. HOTD ta para pa ambiente i esei sigur tabata e kaso djadumingu anochi ku animashon di Heinrich Pieter, Roald Balentien, Lady Lava i DJ Maria de la O.
Grupo HOTD a keda fundá bou di liderazgo di Janis Vinck ku a tuma e batuta di su mama Hilda Vinck-Leañez. Sra. Hilda ta un baluarte di karnaval di Kòrsou kende a kuminsá ku e grupo ‘Jumping Hats’ na aña 1972. Jumping Hats a partisipá durante 36 aña den karnaval.
E nòmber ‘Hats off to Dreams’ ta un rekonosementu di esaki, pa kita pèchi pa e logronan durante añanan i e inspirashon pa kuminsá grupo nobo. E tim prinsipal tras di HOTD ta Janis Vinck, Lysayé de Windt, Liselle Pas, Sadie Vinck, Chiarra Lo-A-Njoe i Deva-Dee Siliee.
Grupo ‘Hats off to Dreams’ lo drenta kayanan di Otrobanda durante Marcha di Karnaval kompañá pa e banda Dreams. E kolaborashon ku Dreams, ku tambe tabatin un meta pa kuminsá un grupo di karnaval propio, a duna e empuhe pa partisipá den Karnaval den 2019.
E trahe ‘Royal Warriors of Wakanda” ta un trahe di guerero futurístiko, manera e diferente personahenan ku por a mira den Black Panther. Den e trahe ta usa elementonan afrikano, manera e print geométriko den e mantel di hende muhé i hende hòmber i den e paña prinsipal. Ku e trahe di guerero tin protekshon na skouder i na pia i un handpiece stail di arma. E koló oro ta alabes e koló prinsipal di guereronan ku ta royal. E elementonan prinsipal ta dekorashon di stenchi i kralchi hopi detayá den faha, headpiece i kadena inspirá pa kreashonnan di diferente tribu afrikano. Netamente e elementonan aki ta hasi e trahe unu úniko ku sigur lo sobresalí komo un kreashon diferente i inovativo den Karnaval. E trahe ta un diseño i kreashon propio di miembronan e grupo.
Grupo HOTD ta bai ku un kantidat limitá di hende den e promé aña, pero grandi na ambiente! Tur persona interesá den partisipá ku Grupo HOTD den Karnaval 2019 por inskribí via di wèpsait www.hotd.co i por manda mensahe via FB: https://www.facebook.com/hatsofftodreams/