WILLEMSTAD.- Djadumingu 27 di òktober Grupo Hats off to Dreams (HOTD) a revelá su kreashon pa Karnaval 2020 bou di un públiko entusiasmá na Villa Maria. Pa Karnaval 50, Grupo HOTD a bai bèk den siglo 17, na inisio di kreashonnan ‘alta moda’, ku e tempu ei a nase na kas real franses. Un di e personanan históriko ku a inspirá loke awendia ta yama ‘alta moda òf Haute couture’, ta e reina rebelde Marie Antoinette. Huntu ku su kosturero, Rose Bertin, kende nan tabata yama e promé ‘Minister of Fashion’ nan tabata pusha límite di loke hende a kustumbrá di bisti i bini ku kreashonnan ekstrabagante i ekstraordinario. Esei ta presísamente loke a inspirá Grupo HOTD tambe: pa pensa kon pa engrandesé i revolushoná nos fiesta magno di Karnaval.
Pa Karnaval 50, Grupo HOTD ta trese ‘HOTDcouture’ den kayanan di Kòrsou, dor di bai bèk den kuna di moda i trese esaki bèk den un re-imaginashon total. Ku e tema aki nos ta duna honor tambe na tur kosturero i diseñadónan ku durante 50 aña a duna realse na nos Karnaval ku trahe i kreashonnan ku públiko lokal i internashonal por a disfrutá inmensamente di dje. Nos ta kita sombré pa nan kreatividat i kurashi i ta sinti nos honrá di por sigui ku e legado aki pa añanan benidero.
HOTDcouture, estilo Grupo HOTD, ta konsistí di trahenan real ku tela di felpa i  detayenan di oro pa asentuá e trahe. E aksèntnan prinsipal ta flornan di diferente koló i tamaño dòrná ku diferente tipo di pèrla i stenchinan detayá. E promé aspekto eksklusivo ta e tela ‘turquoise’ di flor ku ta diseñá i imprimí  eksklusivamente pa Grupo Hats off to Dreams i tin nos nòmber HOTD den e tela.
E di dos detaye sobresaliente, ta un eskudo tambe diseñá i imprimí eksklusivamente pa Grupo HOTD.  E eskudo ta konsistí di 5 elemento: E palu di divi divi; honor na nos raisnan na Kòrsou  i nos pais; E patronchi di HOTD; selebrashon di nos famia karnavalesko i nos miembronan; Un ‘unicorn’ pretu, ku ta dedikashon na tur muhé fuerte; E señal di interdependensia, representando e echo ku nos tur ta konektá i mester di otro. Ta huntu miembro i gruponan ta forma Karnaval.
I mei mei un triangel ku 6 strea ku ta e 6 miembronan ku a funda e grupo.
Pa su di dos aña Grupo Hats off to Dreams lo bai Marcha Grandi ku un kantidat limitá di persona i na e momentunan aki e Grupo tin un lista di espera. Pa mas informashon por bishitá www.hatsofftodreams.com i FB Hats off to Dreams.