WILLEMSTAD.- ‘I Love HipHOp and R&B Curaçao’ ta un grupo di Tiner ku ta bai partisipá pa di kuater biaha den Parada di Tiner 2020.
E grupo ku a keda skohe komo ‘Grupo Tiner di aña 2018’ a traha hopi fuerte pa nan mantené nan mes durante dje añanan ku ta tras di lomba i ku satisfakshon nan a logra esaki.
E echo di a keda skohé komo grupo di aña 2018 a duna nan mas empuhe pa nan sigui ku e grupo i duna e hóbennan e oportunidat pa por partisipá den Karnaval.
Pa 2020 esaki lo no ta un eksepshon. Nan ta trahando duru pa logra tur nan soñonan pa e Parada di Tiner 2020. P’esei nan lo bai tin nan propio Elekshon di Rei i Reina Tiner 2020, dia 9 di novèmber próksimo den e hardin di Because Entertainment Center.
Durante di e anochi aki tambe lo bai tin presentashon di nan trahe pa Parada di Tiner 2020. Lo tin animashon di ICONS, Dj Krokzz, Dj Jay T, Dj Synthz i Dj Denny. Na final lo tin un Jump –In Afterparty.
Un total di 9 hóben ku lo bai partisipá na e elekshon, 5 Reina i 4 Rei lo kompetí pa e título di Rei & Reina Tiner ILHHRB 2020 i nan lo bai kompetí pa e premio máksimo di Rei & Reina Tiner di Karnaval dia 24 yanüari 2020.
Karchinan ya ta optenibel serka tur partisipante i miembronan di ILHHRB. E elekshon lo kuminsá pa 7 or i ta plania pa terminá 10 or di anochi.
E partisipantenan ta: Pa Rei Tiner: 1. Shersand Wanga, 2 Bryangelo Claresa, 3 Dievenier Hamen i 4 Alexander Juliana. Pa Reina Tiner: 1 Keilan Isidora, 2 Roshainy Windster, 3 Marinelis Eisden, 4 Suyay Garcia  i 5 Kionnah Gaari.
Buska bo karchi bin apoyá e partisipantenan, disfrutá di e Show di Trahe i di e tremendo ambiente ku ILHHRB ta ofresé den e Hardin di Because Entertainment Center.