WILLEMSTAD.- Grupo Originales Rítmiko, konosí komo Grupo OriRi a kumpli nan di tres aniversario ayera i a selebrá esaki ku lansamentu di tres kansion ‘live’, tres piesa konosí dje grupo ku a wòrdu saká awor den nan vershon ‘live’.

‘DEN E BEMBE’ a kombersá ku Ludwig ‘Dj Danger’ Isabella, lider di Grupo OriRi pa dje forma ei nos tende di dje e historia kòrtiku dje grupo.

‘Mi a mira ku na Kòrsou no tin gruponan rítmiko ku ta promové Kòrsou su ritmo. Tur e gruponan ku tabatin promé a skohe pa toka piesanan di Boneiru. Niun hende no a kue e tumba i seú i laga nan sigui zona henter aña’, asina dj Danger a kuminsá splika.

Lindomar Henrietta di ESO a hunga un ròl importante den lantamentu dje grupo. ‘Lindomar ta esun ku a keda pusha mi i a pone ku mi a bin lanta OriRi banda di Los Originales.

Riba e pregunta kon e ta mira e grupo awor ku esaki a kumpli su di tres aniversario, Danger a kontesta ku ‘Mi ta mir’é hopi bon, nos a bai hopi dilanti. Kòrsou a bira mas konsiente di su Kultura. OriRi a bin kibra e eis di toka tumba i seú mará na temporada. Mi tin seú ku mi a partisipá na 2019 kuné na Kantadó Mayó, por sierto nos a gana Kantadó Mayó, promé finalista i segundo finalista, ku ketu bai nos ta tokando’.

Pa e selebrashon di e terser aniversario, OriRi, a lansa ayera tres piesa manera nos a indiká previamente. ‘Si un hende ke mi ta manda e piesanan via App pa nan’, asina Danger a indiká bisando ku por tuma kontakto kuné libremente pa esaki.

‘Kultura 365’

Grupo OriRi a drenta studio di grabashon pa kuminsá graba e komposishon ‘365’, ku ta referí na e 365 dianan di aña i pa indiká ku e grupo durante di 365 dia di aña ta promové Kultura di Kòrsou.

‘Nos lema te ku aworakí tabata ‘OriRi te paden!’, na momentu ku e piesa nobo keda lansa nos lo kambia nos lema pa ‘OriRi Kultura 365’, asina Danger a splika, indikando mesora ku no tin un fecha ainda pa e lansamentu, debí ku a wanta ku e grabashon. ‘Nos a wanta un ratu pa wak e desaroyonan dje pandemia, despues ku nos ‘flatten the curve’, nos ta sigui’, asina Ludwig ‘Dj Danger’ Isabella a terminá bisando.

Pabien na Grupo OriRi. Ban sigui sostené nos artistanan lokal!.