WILLEMSTAD.- ‘DEN E BEMBE’ a risibí di e agrupashon musikal Grupo Rítmiko Caribenses un relato relashoná ku un problema ku nan tin pa loke ta trata petishon pa risibí puntuashon di Kantadó Mayó 2019.
E relato ta lo siguiente: “ E djaweps despues ku resultadonan a bira konosí kua tabata e seúnan ku a klasifiká pa e anochi final di Kantadó Mayó 2019, Grupo Rítmiko Caribenses a hasi un petishon na Direktiva di FKSK pa  puntuashon di e seúnan ku nan a partisipá kuné.
Rítmiko Caribenses a partisipá ku 3 seú di kual niun no a klasifiká. E siguiente djaweps mes miembronan di e grupo a aserka Presidente di hurado sr. Carl Camelia pa por haña e puntuashon pero sr. Camelia e referí e grupo na Direktiva di FKSK.
Seguidamente a aserka sr. Guanipa kaminda a bin komprondé ku mester warda pa un reunion ku direktiva di FKSK lo mester hiba ku miembronan di Hurado promé, i despues di esaki lo por tin posibilidat pa haña e puntuashonnan.
Mientrastantu tin kasi dos siman i kada bes ku puntra mester tende di FKSK ku mester keda ‘pending’.
Miembronan di Grupo Rítmiko Caribenses lo ke haña nan puntuashon pa asina den nan seno sinta analisá kiko a bai robes pa por traha riba esakinan pa siguiente aña, pero na e momentunan aki no por komprondé ku tur e teknologia di awendia ta asina difísil pa bai den un kòmpiuter, i saka skor si supuestamente esakinan ta eksistí realmente.
Banda di tur kos tabata kore e rumor tambe ku Grupo Rítmiko Caribenses a wòrdu deskualifiká, i si esaki ta bèrdat e grupo tin gana di sa pa ki motibu”.
‘DEN E BEMBE’ ta pendiente pa risibí di FKSK un reakshon riba e dunamentu di puntuashon.