WILLEMSTAD.- Ayera nochi tur lider di Gruponan Tiner i Hubenil pa Karnaval 2019 a risibí nan chek for di man di Direktiva di Grupo T’Aki Tin.
Manera ya ta konosí durante di selebrashon di e famoso Jump in di T’aki Tin na Brakkeput Mei Mei, Fundashon JAG a risibí e chek simbóliko for di man di e Direktiva di T’aKi tin pa e suma di 25 mil florin. Esaki ta  wòrdu repartí entre tur e gruponan di Tiner i Hubenil ku a partisipá den e Marchanan di 2019.
Durante di e evento, sra. Talitha i sra. Liliana a bisa ku pa nan ta un plaser di por hasi e bunita gesto aki i ku si nan lo por a hasi mas pa e gruponan, nan lo a hasié. Nan sa ku e suma no ta dje hopi ei pero ta algu ku por yuda e gruponan sigur.
Juni Aniceta, direktor di Fundashon JAG a ekspresá su gratitut pa ku e gesto aki, ku sigur lo ta algu balioso pa kada grupo i ku e ta apresiá kada organisashon ku por duna un man na nos gruponan pa por engrandese nos karnaval.
Riba e fotonan por tuma nota di algun di e lidernan ku a tuma nan chek for di man di nos embahadornan Tiner i Hubenil 2019, i parti dje team di T’aki Tin den presensia di sr. Sergio Bitorina, sra. Talitha Hollander, sra. Liliana Sanchez i sr. Hubert Aniceta, direktor di Fundashon JAG.