WILLEMSTAD.- Un notisia sigur interesante ku a aparesé den prensa na Guatemala (Nr. 127 ranking di FIFA), ta e echo ku e direktor tékniko di selekshon di futbòl dje pais, Amarini Villatoro, ta di biahe pariba i pabou buskando futbolistanan di mayornan guatemalteco pa nan kompromiso kontra di Kòrsou (Nr. 76). Villatoro siman pasá tabata na Merka pa konvensé e hungadónan Alex Roldan i Rubio Rubin pa bisti unifòrm dje pais. Rubin ya a bai di akuerdo.

Ta resultá, sinembargo, ku e hungadó di Real Salt Lake no tin pasport guatemalteco ya ku el a nase na Merka. Komo ku lo dura muchu largu pa legalisá su papelnan di nasementu na Embahada di Guatemala pa por start e proseso, e federashon a disidí ku nan lo bai dirèkt serka FIFA ku e petishon spesial pa por aliniá e hungadó pa e partido kontra di Kòrsou.

E presensia di Rubin i algun kara nobo ta importante pa Guatemala, ku 8 di yüni lo enfrentá Kòrsou. Mas ainda si tene kuenta ku dos ousensia serio den persona di Chucho Lopez –nasé na Mexico i aktivo ku América- i Nico Rittmeyer, nasé na Merka i hungadó di Charleston Battery. Ningun di dos ta disponibel pa e weganan di Guatemala den luna di yüni benidero.