ABVO ta urgi esnan responsabel pa atendé ku e situashon

WILLEMSTAD.- Segun e guera di palabra den prensa i riba retnan sosial ta kontinuá entre èks minister di Finansa i aktual parlamentario pa MFK, Javier Silvania i Ontvanger, Alfonso Trona ta kontinuá, e situashon pa e trahadónan di Servisio di Impuesto ta bira mas i mas difísil. Tantu paden di e organisashon komo klientenan ku ta akudí na Servisio di Impuesto ta kousa un situashon di tenshon ku ta stroba funshonamentu normal di e servisio.

Asina miembro di direktiva di ABVO, Raymond Margaritha ta duna di konosé na EXTRA. E ta splika ku e sindikato ta preokupá pa e situashon na Servisio di Impuesto. Trahadónan ku regularidat ta tuma kontakto ku un òf otro miembro di direktiva di ABVO pa splika e situashon ku nan traha bou di dje. Pa e motibu aki e sindikato ke pa tantu gobièrnu, komo doño di trabou, komo hefenan di e servisio atendé ku e situashon promé ku e sali for di man.

Margaritha ta splika ku e trahadónan ta sufri mei mei di e guera di palabra andando entre Silvania i Trona. Ekspreshonnan den sentido di kiko tur Trona òf ministernan lo a hasi den pasado i manda siudadanonan bai reklamá mesun trato, ta hinka e trahadónan den problema. Tin kliente ku ta fanátiko òf ta kere siegamente den loke e minister ta bisa i, awor mas ku nunka, ta atendé di tal forma tambe ku e trahadónan.

Esaki miéntras ku e trahadó no tin nada di aber ku e diskushon di por ehèmpel ken a duna eksonerashon òf “voorschot” na ken den pasado. Trahadónan ta sigui simplemente instrukshon di trabou ku nan haña di nan doño di trabou i nan hefe di servisio. Esaki ta algu ku ta bou di investigashon i ABVO ta kere ku mester duna na promé lugá espasio pa laga e investigashon kana.

Na di dos lugá Margaritha ta bisa ku tantu doño di trabou komo e hefenan mester duna informashon na e personal riba e investigashon andando i ku esaki por ta motibu ku tin investigadónan ta puntra pa dokumento òf hasi e personal sierto pregunta. Di e forma aki ta trese un poko klaridat, loke ta baha e tenshonnan. “Ta trata di trahadónan humilde ku no tin arte ni parti den loke ta tumando lugá.”

Segun Margaritha e situashon a bira di tal forma ku asta internamente e ta kousa problema entre trahadó nan. “Remarkenan di ken lo ta amigu di ken ta kousa iritashon bou di e personal, miéntras ku trahadónan no tin nada di aber ku e tomonan di desishon na nivel di gerensia i polítiko ku a tuma lugá den pasado.”