WILLEMSTAD.- Guus Hiddink (74) di forma ofisial a asumí e funshon komo direktor tékniko di selekshon di futbòl di Kòrsou. Ayera prensa di Kòrsou tabata testigu di presensia di Hiddink riba tereno den Stadion Ergilio Hato, kaminda e gran figura di futbòl hulandes a dirigí e training di selekshon.

Hiddink ta konta ku un karera impreshonante komo trainer. El a start na aña 1981 komo trainer di De Graafschap den futbòl hulandes, pa despues sigui ku PSV, Fenerbahce (Turkia) i Valencia (Spaña). Na nivel di selekshon, el a para na kabes di ekipo nashonal di Hulanda, tambe di Sur Korea ku kua el a yega te semi final di Kopa Mundial 2002. Seguidamente na nivel di pais el a dirigí selekshon nashonal di Australia den Kopa Mundial 2012 i  por último esun di Rusia den Kopa Oropeo. Ironia ta ku estando na kabes di e ekipo ruso nan a gana di netamente Hulanda den semi final, eliminando esaki for di Kopa Oropeo.

Hiddink na dos okashon a keda premiá komo Coach di Aña di Hulanda, ku tabata na 2002 i 2005.

Despues di un karera di algu mas ku tres dékada komo trainer, Hiddink a disidí ku e ta baha ku penshun. Sinembargo, riba aserkamentu di FFK el a bai di akuerdo pa regresá riba tereno di wega pa duna su kontribushon na e trabou ku a start pa Kòrsou por yega Kopa Mundial di FIFA 2022 na Qatar.

Ta konosí ku FFK lo ta usando e mesun strategia apliká ku Patrick Kluivert, ku kua a logra atraé vários bon futbolista ku rais kurasoleño kendenan a hunga den selekshonnan hubenil di Hulanda ku speransa di por haña e yamada pa selekshon grandi. Ku Hiddink na kabes di selekshon di Kòrsou no tin duda ku vários futbolista ku ta bini na remarke pa hunga sea pa selekshon di Hulanda òf di Kòrsou, lo por skohe pa Kòrsou konsiderando e avalancha di hóbennan hulandes ku tambe tin nan bista riba selekshon di nan pais.

Por sierto ku mañan den oranan di mainta lo tin un konferensia di prensa di FFK ku presensia di Hiddink.

...Riba e kombinashon di potrèt por mira parti di training di ayera tardi, dirigí pa e propio Guus Hiddink...