HAARLEM.- Despues di e viktoria di Kòrsou ayera kontra Merka den Honkbalweek Haarlem Deporte EXTRA a kombersá ku mènedjer di selekshon di Kòrsou Hainley Statia.

E promé kos ku Hainley a bisa ta ku e hungadónan ta en bèrdat hasiendo nan bèst i ku e ta hopi orguyoso di e grupo.

Kosnan ta bayendo bon, defensa ta resaltá, pichernan ta tirando strike miéntras ku bateadónan ta hasi e adaptashon nesesario Statia a sigui bisa.

El a para ketu na e adaptashon di bateadónan por ehèmpel kontra Merka ku tin pichernan ku ta tira mas duru di loke peloteronan di Kòrsou ta kustumbrá kuné. Korementu di base bon tambe ta bayendo bon. Un algu ku Statia for di trempan a bisa ku lo ta importante den e torneo aki.

E korementu di base bon i agresivo ta pone preshon ku por krea problema pa defensa i ta algu ku mi ta keda ripití na e hungadónan Hainley Statia a sigui bisa nos.

Tur e kos chikitunan ta duna un ekipo bentaha den torneonan asina aki e mènedjer di selekshon di Kòrsou a bisa.

Hainley a bisa tambe ku selekshon di Kòrsou ta bringando algun leshon mirando ku den nos beisbòl nos no ta hunga ku e regularidat aki.

“Gana òf pèrdè awe, mi ta hopi orguyoso di e selekshon di Kòrsou, esaki pa motibu ku niun hende no a spera nos yega asina leu den e Honkbalweek Haarlem”, Statia a trese dilanti durante e kombersashon.

“Kontra Hapon i Merka, ku ta dos di e mihó selekshonnan, selekshon di Kòrsou a lusi bon i hunga bòn beisbòl”, Hainley a indiká.