WILLEMSTAD.- E di tres edishon di e Festival di Jump IN na Kòrsou HAK’E ta kla. Ku un line up di banda nan netamente lokal HAK’E un biaha mas  tin tur ingrediente pa ta un éksito rotundo.
Dia 3 di febrüari na e parkeerplaats di Sambil, HAK’E lo konta ku presentashon di: BDM, GIO the Legends, Highway Band, Vega, Gentz, Dreams, Dolce i ERA. Un total di 8 agrupashon musikal ku lo presentá un tras di otro for di 7or di anochi te ku 3or di mardugá. Dj RO-1 huntu ku MC Chris Strick lo kompletá e line Up musikal.
3 tarima lo forma e peicentro di e Jump In Arena kaminda un tras di otro tur agrupashon musikal lo presentá nan repertorio karnavalesko pa 45 minüt. Naturalmente kada un di nan lo tin artistanan  invitá i ta un honor pa nos por presentá e Rei òf Reina di Tumba 2018 den Hak’E Curaçao jump In festival 2018.
Hak’E tur aña ta purba na duna oportunidat na diferente agrupashon musikal. P’esei nos ta ansioso pa mira Highway band huntu ku Roald Baletien presentando un di e tumbanan ku sigur a dal masha masha duru den 2017 “Kara Kara”.
Banda di esaki nos lo haña Reineier Lijfrock den kombinashon ku Ishair Monte i tambe Brian Dekkers presentando un repertorio ku sigur hopi di nos ta ansioso pa eksperensia. Despues ku nos a disfrutá na 2017 di Gio’93 e aña aki Gio the Legends lo ta un di e bandanan ku ta debutá den Hak’E 2018. Pa loke ta trata Vega, Gentz, Dreams i Era nos tur sa ku esakinan ta agrupashonnan musikal ku praktikamente a bin ta krese ku henter e evento di Hak’E Curaçao Jump In festival i ta garantia pa un goso total.
Estreno mas Wepa organisadó di e festival aki di e forma aki ta duna aporte konsiderablemente na nos artistanan lokal i alabes ta rekoudá fondo pa e grupo di karnaval Estreno Mas Pikete.
Karchi pa e Festival aki ta kosta ANG 55,00 ku ta inkluí bo pèchi. Karchinan ta optenibel na Mensing Caminda, Beep Beep, Sambil (punto Blanco) i miembronan di Estreno Mas Pikete.

HAK’E, un konsepto di 8 ora largu di músika bibu tres’é pa 8 diferente agrupashon musikal, Dj i artistanan invitá, den un espasio di 360 grado di zonido i efektonan di lus, ku tres diferente tarima ta garantia pa un anochi karnavalesko ku hopi ambiente di Tumba i Roadfire.