WILLEMSTAD.-  Den 2019 Kòrsou su karnaval lo ta sumamente grandi i un di e eventonan ku sigur ta kontribuí na esaki ta  “HAK’E Curaçao Jump In Festival”. E biaha aki HAK’E lo ta un evento ku ta tuma lugá dia 22 i 23 di febrüari 2019.
Anunsiando nan patrosinador ofisial “Volkswagen Curaçao” pa e wikènt di “HAK’E Curaçao Jump In Festival” den 2019, Estreno mas Wepa a inisiá su rueda di prensa dunando informashon di un tremendo wikènt den febrüari ku hopi ambiente karnavalesko.
E di 4 edishon di HAK’E lo ta unu ku 2 dia di aktividat: Djabièrnè dia 22 di febrüari HAK’E lo ta e esenario pa duna Homenahe na Tumba. Organisadónan a hinka un programa den otro kaminda 4 orkesta lokal lo tin un repertorio ku diferente Rei i Reinanan di Tumba pa asina riba djabièrnè e amante di Tumba i tambe e fanátiko di HAK’E lo haña un espektákulo karnavalesko den un ambiente ya kustumbrá di HAK’E. Por lo ménos 10 Reinan di Tumba lo presentá ku orkestanan manera ERA, Doble R, Randal Corsen Ochestra i Happy Peanuts.  Tumberonan manera Mr. Saab, Farley Lourens, Tico “Benoni” Balentien, Ike Jesurun, Gibi Doran, Izaline Calister, Elia Isenia i Reinier Lijfrock ta algun di e artistanan ku lo presentá e anochi aki.
Djasabra dia 23 di febrüari HAK’E lo ta esenario pa nos ménos ku 9 agrupashon musikal ku lo kompartí 3 diferente esenario durante un eksploshon di músika di roadfire, tumba i algun sorpresa mas. HAK’E ya un evento sumamente gustá ta pinta di ta un wikènt pa tur hende. Agrupashonnan manera Hype, One, Highway band, Vega, Dolce, Era, Dreams, Gentz i Icons by Gio huntu ku tur artistanan invitá ta ingredientenan pa un ambiente sin igual. Kombiná esakinan ku DJ Ro-1 i tambe MC Chris Strick bo sa ku HAK’E ta un Festival ku bo no por pèrdè.
Huntu ku tur e agrupashonnan musikal, dj-nan, Tumberonan, artistanan invitá HAK’E i Volkswagen Curaçao ta duna bo e oportunidat di sali riba djasabra dia 23 di febrüari 2019 komo e ganadó apsoluto di un Volkswagen Polo 2019.
Kumprando bo karchi pa HAK’E i ta presente den Festival Center riba djasabra 23 di febrüari 2019, abo por ta ganadó di e outo aki. Ainda no ta kla; Nagico Insurance e partner ofisial di seguro di HAK’E a sòru pa e outo ta sigurá i tambe duna un montante na gasolin grátis ora bo gana e Volksagen Polo 2019*. (*sigui reglanan di kampaña).
Despues di por a organisá HAK’E 3 aña konsekutivo riba e tereno di parker na Sambil den 2019 Festival Center lo ta e kas di e festival aki. Den u kolaborashon sumamente positivo e organisashon di HAK’E huntu ku AMAK a yega na un akuerdo pa organisá tur e dos dianan aki den Festival Center. Estreno mas Wepa a konfirmá ku e fanátiko di HAK’E lo eksperensia Festival Center di un manera ku nunka promé nan no a wak.
Volkswagen Curaçao, Nagico Insurances, Amstel Bright, Massive Productions, Estreno mas Pikete i Estreno mas Wepa ta orguyoso di por organisá e wikènt di HAK’E Curaçao Jump In festival dia 22 i 23 di febrüari 2019 i ta invitá un i tur pa kuminsá buta e fecha di 2 di yanüari 2019 kla pa asina kumpra bo karchi serka miembronan di Estreno Mas Pikete.
Karchi pa djabièrnè ta kosta: ANG 45,00, Karchi pa djasabra ta kosta: ANG 65,00 i Pakete pa tur dos dia ta kosta: ANG 95,00
Sigui tur medionan di komunikashon i tambe e página di Facebook @hakecuracao pa bo keda na altura di tur desaroyo di e Festival karnavalesko ku lo bira aun mas grandi den 2019. HAK’E Curaçao Jump In Festival huntu ku su partner nan ta deseá tur hende felis dianan di fiesta.