WILLEMSTAD.- Ayera tardi ‘Louie Louie’ a bishita Festival Center pa tuma nota dje trabounan relashoná ku e evento Hak’e ku ta tuma lugá e wikènt aki. Nos a topa ku Manchi Harms kende huntu ku su tim tabata trahando i mester bisa ku nan ta praktikamente kla ku e set up di tres stage, diferente bar i un foodcourt. Djabièrnè anochi lo tin e ‘Tributo na Tumba’ ku presentashon di e Reinan di Tumba: Izaline Calister, Gibi Doran, Reinier Lijfrock, Ike Jesurun, Elia Isenia, Hendrik de Windt, Tico Balentien, Luwi Jano, Farley Lourens i Rei di Tumba 2019, Dibo Doran. Kompañamentu musikal riba djabièrnè anochi lo ta na enkargo di ERA, Doble R i Randal Corsen Orchestra,. Happy Peanuts i dj Argenis Huerta tambe ta forma parti dje animashon musikal riba djabièrnè anochi. Espektativa ta haltu e djasabra kaminda lo tin presentashon di 9 banda i dj RO-1. E bandanan ku lo presentá ta Hype, ONE, Dolce, Gentz, Icons by Gio, Dreams, Vega, ERA i Highway Band. Si bo no tin bo karchi ainda, kumpra esun di bo, bai buska bo pèchi i nos ta topa pa goso total den Hak’e e wikènt aki. Riba foto algun imágen dje trabounan ku ta tumando lugá den Festival Center.