WILLEMSTAD.- Awe, djamars 25 di yüli, Freewinds lo ta anfitrion di un otro tremendo konsierto organisá pa e hóben JudleyJohn Kirindongo. Lo ta un konsierto pa rekoudá fondo pa un bon kousa, pues Kòrsou, laga nos respondé masalmente i sostené e hóben aki den su soñonan.

Man den man, laga nos tur duna un man, esaki ta e tema di e konsierto di djamars awor riba e presioso krusero Freewinds, ku pa añanan tin reputashon pa ta anfitrion di shownan na nivel i den bon ambiente.

...JudleyJohn Kirindongo...

JudleyJohn, un hóben trankil, humilde pero talentoso, pa un aña i piku kaba, banda di su skol regular, ta siguiendo un kurso di ‘sound engeneering’ abordo di Freewinds i ta bayendo fantástiko.

Presensiando e diferente shownan el a tuma un kurashi di tuma rienda riba organisashon di un evento musikal e mes awor. Esaki lo ta un fundraising pa yud’é kubri su gastunan eskolar pa e siguiente aña. Un inisiativa di aploudí i sostené.

P’esei e ta gosa di sosten di artistanan lokal manera Toni Worrell i Kadir Snijder ku lo presentá e anochi aki i sigurá bo un anochi ekstraordinario. Otro artistanan lokal ku a uni forsa ta Andre Diecke, Wenson Plesimey a.k.a HG i Gilmar Monte. Un konstelashon di artistanan maskulino dunando nan sosten na e hóben aki.

Bin gosa i koperá ku un bon kousa, pa e suma chikitu di 10 florin pa karchi. Bo por pidi di bo via 660-0306. Portanan di Freewinds lo habri for di 7.30’or i e konsierto lo ta di 8’or pa 10’or di anochi.