ISRAEL.- Ayera nochi a tuma lugá e di 70 edishon di Miss Universe na Israel. Un sertámen ku a konta ku partisipashon di 80 damita.

E organisadónan a presentá un stage sumamente impreshonante. Bistanan masha bunita na Israel a hala atenshon.

E aña aki un biaha mas a keda demostrá ku e ‘malchi’ di Miss Universe a kambia. E profil di sigur e Tòp 3 di Suráfrika, India i Paraguay ta demostrá esaki. Tur tres kandidata a respondé e ultimo pregunta masha bon mes.

Lalela Maswane di Suráfrika a enkurashá pa pone kurashi riba komfort na kada okashon ku esaki ta posibel. Sandhu a teorisá riba e problema mas grandi ku hubentut tin ku ta e falta di konfiansa propio i individualidat, miéntras ku Ferreira a duna un kontesta ekstremadamente positivo pidiendo tur hende pa djòin forsa pa hasi tur lokual bo ke logra.

Pabien na Thessaly Zimmerman di Aruba ku a logra di drenta den Tòp 10 di Miss Universe.

RESULTADO

Miss Suráfrika, Lalela Mswane a resultá e di dos finalista, Miss Paraguay, Nadia Ferreira a bai ku e premio di promé finalista i komo Miss Universe 2021 a keda koroná Miss India, Harnaaz Sandhu, un diva masha elegante ku tabatin un tremendo presentashon. Pabien na e kolonia Indio residensiá aki na Kòrsou.