WILLEMSTAD.- Te ainda no ta kla kon grandi e bónus di Pasku  lo ta pa hende ku ta kobra ònderstant. Asina minister di Desaroyo Sosial, Labor i Bienestar (SOAW) Ruthmilda Larmonie-Cecilia a splika EXTRA. Pero nan lo haña algu èkstra si, minister a konfirmá.

Manera ta konosí Konseho di Minister resientemente a disidí pa pone un montante disponibel pa hende ku ménos rekurso. Ku esaki gobièrnu ta duna un bónus na e hende ku tin hopi nesesidat.

E aña aki gobièrnu tin un montante reservá. Na promé instansia a plania pa duna algu èkstra na ámtenarnan via un bónus di Pasku. Manera ta konosí ámtenarnan e aña aki ta haña 135 florin komo bónus. Diferente sindikato a eksigí 250 florin komo bónus, manera ántes. Pero gobièrnu a splika ku e aña aki nan no tin asina hopi sèn pa oumentá e bónus te 250 florin. Na final a disidí pa yuda hende ku ménos rekurso.