WILLEMSTAD – Bleacher Report ta informando ku Hensley Meulens, aktual coach di banki pa San Francisco Giants, lo keda entrevista pa e puesto vakante di manger di e ekipo. Manera ta konosí e aktual manager Bruce Bochy a retirá despues ku temporada aktual a finalisá djadumingu último. E entrevista aki lo mester tuma lugá den e siman aki. Anteriormente e coach yu di Kòrsou a entrevista pa e mesun puesto vakante pa e organisashonnan di Cincinnati Reds, Detroit Tigers, Minnesota Twins i New York Yankees. Meulens lo ta e promé kandidato pa keda entrevista pa Giants. Meulens ta ku e ekipo di Giants for di 201, promé komo coach di bateo i awor ‘bench coach’, ku ta man drechi di e manager. Den e 9 añanan ku Giants, e ekipo a sali kampion mundial ma tres okashon. Hensley Meulens di 52 aña di edat ta papia 5 lenga i ta bon gusta pa e hungadónan. Segun e reportahe Meulens, ta e kandidato faborito pa bira manager di e ekipo. Si esaki keda realisá, e ta bira e promé yu di Kòrsou manager den Liga Grandi. E organisashon di Chicago Cubs ku tambe ta sin manager aktualmente tin Hensley Meulens riba nan lista kòrtiku di posibel kandidato pa e puesto aki tambe.